تجربتي مع جهاز PMD للعناية بالبشرة

السلام عليكم

قبل فترة اقترحت علي صديقة لي جهاز اسمه “PMD” لتقشير البشرة أو تنعيمها، وقالت لي انه في البداية ما أثر فيها لكن بعد ما صابتها حساسية من نوع أكل وكثرت الحبوب في وجهها، استخدمت الجهاز وبين الفرق مباشرة.

فاشتريته.

سعره وطريقة شرائه: 

ممكن تاخذينه من موقع سيترس، وممكن من الموقع الرسمي الخاص فيهم، أنا خذته من سيترس الإصدار الأول وكلّفني تقريبا 800 ريال، شريت مجموعة رؤوس بديلة بـ 140 ريال ووصلني المنتج في أسبوعين. النسخة الي عندي مثل الي ظاهره بالصورة أعلاه.

نظريته: كيف يعمل

PMD هو جهاز عناية منزلية، اختصار لـ “Personal Microderm”، يستخدم في المنزل لإزالة الطبقة العلوية من البشرة وبالتالي يزيد النعومة والنضارة ويخفف من آثار الحبوب أو الجفاف أو آثار الزمن، وحركته الدائرية تساعد في تصغير المسامات مع الوقت وبذلك تصير البشرة على المدى البعيد أنظف وأنعم وأكثر شباب ونضارة.

قطع الجهاز وأنواعها:

pmd-microderm

الجهاز سهل الاستخدام، ماله قطع كثير ويعتمد على الحجر الصغير الي تركبه في الحامل ويقشّرلك بشرتك بدون مواد كيميائية تهيج البشرة، وبدون مايترك آثار أو يحتاج أيام عشان تشوف النتيجة، لأن النتيجة تكون فورية. حسب ماقريت انه موجود أجهزة “Microderm” بس على أكبر في عيادات الجلدية ومكلفة، لكن ماأعرف صحة هالكلام لأني ماجربت بنفسي ومو من زوّار عيادات الجلدية على الإطلاق، ما أرتاح للأدوية.

الجهاز له إصدارين أو ثلاث تقريبا، الفرق بينهم إن الإصدار الأول فيه سرعة وحدة والإصدار الثاني فيه سرعتين لأصحاب البشرة الحساسة والي يحتاجون سرعة أبطأ، في نوع خاص بالرجال ونسخ ثانية مافيها فرق كبير، مجرّد تحديث.

81mZTLmEnWL._SY355_

الراس يتحرك بشكل دائري وسريع جدا، وفي ألوان للراس وكل لون يعني مرحلة  أو شدة معينة. أخفها الأخضر، والقوة وخشونة الحجر تزيد مع الأزرق ثم الأحمر ثم الأسود، الأخيرين يفضل استخدامهم على الجسم عشان ما يتسبب بجروح للبشرة إذا مافيها أماكن جافة جدا تحتاج هالقوة، برضو في حجمين، صغير غالبا للوجه، وكبير للجسم، لكن ممكن تستخدم الكبير للوجه مو مشكلة إذا تفضل تختصر وقت وتترك الصغير للأماكن الضيقة مثل الذقن وحول الأنف وأعلى الحواجب وكل حجم له راس بلاستيكي مختلف طبعا. هذي القطع تستبدل بعد كل 3 أو 4 استخدامات لأنها تخرب والطبقة الحجرية الي فوق تبدأ تتآكل فما تجيب نتيجة كويسة بعد الاستخدام الرابع أو الثالث، على حسب.

شي مهم: الجهاز مايشتغل على بطّارية، لازم تشبكونه في الكهرباء.

طريقة الاستخدام: 

الجهاز يستخدم مرة واحدة في الأسبوع فقط، لأنه قوي وممكن يسببلك جروح أو الأسوأ ممكن التقشير الزايد عن حده يزيد مشكلة الحبوب عندك خصوصا إذا كانت دهنية، يفضل استخدامه بالليل عشان احمرار البشرة لكن عن نفسي استخدمه أي وقت لأن بشرتي مو حسّاسة.

أولا تنظيف البشرة من المكياج والكريمات والزيوت، اغسلي وجهك بموية أو منظف لطيف (مايكون سكرب أو قاسي عشان مايتركها جافة وتتحسس أكثر من الجهاز)، عن نفسي أستخدم الموية فقط وأحيانا غسول أولاي الأحمر لأنه لطيف. بعد ما يجف وجهك تماما تستخدمين الجهاز، تشغلينه وتحركين من الداخل للأعلى وما تمشين ع المكان نفسه مرّتين. الهدف طبعا مثل مساج البشرة أو طريقة توزيع كريم الأساس، وهو إنك تحركين عكس الجاذبية، من المهم طبعا تشدّين منطقة الخد شوي عشان يتحرك بسلاسة، والجهاز مايسبب ألم ولاتحسين فيه إلا إذا مريتي فيه على حبة بوجهك بالغلط، رح تحسين. يفضل تتخاشينها اذا كانت كبيرة أو لها راس دهني، أو إذا حمراء وقديمة مو مشكلة.

بعد ما تخلصين المكان الي تشتغلين عليه لازم لازم لازم تمسحين وجهك بتونر أولا، تمسحين الراس البلاستيكي بمنديل أو مسحة طبية قبل ترجعين الجهاز للعلبة حقته، أو ممكن تنظفينه المرة الجاية قبل تستخدمينه، حسب فضاوتك. استخدمته أكثر من مرة بدون ما أنظفه لأني نسيت لكن ما صار فيني شي.

بعد التونر الملطف (أستخدم تونر نيفيا للبشرة الحساسية وأحيانا أستبدله بموية ورد) ترطبين وجهك، أو ممكن تستغلين إن البشرة نظيفة وتستخدمين اي ماسك تفضلينه وبعد ماتشيلينه ترطبين، والترطيب ضروري جدا.

النتائج: 

المفروض تشوفين نتائج لحظية سواء النعومة أو النضارة أو اختلاف لون الندبات وآثار الحبوب ولو لدرجة بسيطة. عن نفسي فعلا أحصل على نتائج وخصوصا النعومة والنضارة، الفرق واضح، أما بالنسبة للباقي فما أقدر أحكم لأني ما أستخدمه بشكل أسبوعي، أحيانا أسوي أشياء ثانية بوجهي وماودي أكثّر عشان ما تطلع لي الحبوب الي راسها أبيض والي حسب ما قريت في كثير أحيان تكون من المبالغة في التقشير والتنظيف (Over exfoliating).

والصدفة إني صابتني حساسية أكل مرة، وامتلا وجهي حبوب وصار جاف ويتهيج من الكريمات العادية الي أستخدمها دايم، انتظرت أسبوع إلين خف التهيج وجفّت الحبوب، والبشرة كلها كانت جافة جدا، واستخدمت الجهاز وكان الفرق واضح والنتيجة ممتااازة.

هل ندمت إني شريته؟ وهل أنصح فيه؟ 

ما ندمت اني شريته وبالعكس سعيدة فيه، لكن أتحسف ع الوقت الي يقعد ما أستخدمه فيه لأن بشرتي وقتها ما تحتاج وماودي أخرّب على نفسي وأبالغ، وإنتي الحكم إذا تحتاجينه أو لأ، إذا جفاف بشرتك كبير بيفيدك، إذ عندك بقع جافة في أماكن متفرقة أو كلف (Dry Patch) بيفيدك خصوصا إذا ماودك تدخلين دوامة التقشيرات الكيميائة أو الي تحتاج عناية ووقت وواقي شمس، أو إذا كانت بشرتك باهته وودك نضارة وماتحبين تستخدمين طرق أخرى تاخذ وقت مثل الكريمات والخلطات.

ميزته إنه يقعد لك على المدى البعيد، مايتطلب إلتزام تام عشان تحصلين على نتائج وممكن يقلل الخطوط الرفيعة (ماعندي فما أقدر أحكم) لكن حسب الفيديوات الي شفته في ناس أطروا عليه من هالناحية، والموقع نفسه ذكر هالشي كأحد الفوائد.  هذا الموقع الخاص فيهم https://getpmd.com/ وتقدرون تشوفون فيه صور قبل وبعد الاستخدام لناس جربوه وانتظموا وكتبوا آرائهم، كمان المنتج تكلموا عنه مجلات ومواقع جمال وحصل على جوائز. لكن مرّة ثانية الأشخاص هذولي ممكن يسوقون للجهاز وممكن الوقت والعناية الدائمة هو الي تسبب بتحسّن بشرتهم على المدى البعيد، مو الـ PMD تحديدا، ماقدر أحكم، لكن الأكيد إنه يعطي نتائج فوريّة تستمر لأسبوع تقريبا وممكن أكثر.

هذا فيديو يوضّح طريقة الاستخدام وبتلاقون منه كثير في يوتيوب.

أتمنّى لكم بشرة ناعمة شابة نضرة موحدة اللون صحية بدون مشاكل دائما وأبدا : )

Advertisements